Sælir eru einfaldir. Úkraína, öryggið og Þórdís Kolbrún Reykfjörð Gylfadóttir

Þórdís Kolbrún Reykfjörð Gylfadóttir er tvímælalaust merkasti utanríkismálaráðherra Íslendinga. Hún þorði, þegar aðrir sýndu heigulshátt. Þórdís Kolbrún sleit stjórnmálasambandi við Rússa vegna tilefnislausrar allsherjarinnrásar þeirra í Úkraínu. Aðgerðin var innsigluð með kossi.

Þórdís Kolbrún reit gagnmerkan pistil um sögu Bandaríkjamanna fyrir skemmstu. Þar rennir hún stoðum undir þá staðreynd, að þeir hafi aldrei komið nálægt stríðinu í Úkraínu.

Hin merka grein Þórdísar Kolbrúnar ber fyrirsögnina, „Land hinna frjálsu, heimkynni hugdjarfra.“ Hún segir m.a.:

„Undir lok átjándu aldar tóku þrettán nýlendur Breta í Norður Ameríku sig saman, mynduðu her og tóku ákvörðun um að berjast fyrir frelsi frá öflugasta herveldi heims. Aflsmunurinn var mikill „á pappírnum“ þegar nýlendubúar byrjuðu að velta fyrir sér hvort það væri þess virði að berjast fyrir sjálfstæði.

Annars vegar þrautþjálfaðir og agaðir hermenn heimsveldis búnir fullkomnustu vopnum þess tíma. Hins vegar uppreisnarmenn úr ýmsum stéttum; bændur og handverksmenn með ýmis konar samtíning skotfæra og takmarkaða þjálfun. …

Patrick Henry [hélt] ræðu sem hreif marga og hefur endurómað i gegnum aldirnar. „Menn geta talað um frið og aftur frið, en það er enginn friður,“ sagði hann og lauk orðum sínum svona: „Ég veit ekki hvað aðrir velja, en hvað sjálfan mig varðar þá er valið skýrt; frelsi eða dauði“ („Give me liberty or give me death“).

Þessi hetjulega hugsun var ekki öllum að skapi þá og er enn í dag illskiljanleg okkur sem höfum aldrei þurft að horfast í augu við slíka valkosti og getum ekki ímyndað okkur að þurfa að fórna neinu sem skiptir máli fyrir nokkurn skapaðan hlut; ekki einu sinni peningum eða þægindum. …

Úkraínskt samfélag hefur í margar kynslóðir verið markað af rótgróinni spillingu sem tengist beint rússneskri undirokun. Samfélagið í Sovétríkjunum, og síðar í Rússlandi, er ekki bara þjakað af spillingu. Það er beinlínis byggt á spillingu. Mútur og klíkuskapur eru ekki undantekning heldur meginregla.

Þetta er ástæða hinna miklu svokölluðu „Maidan“ mótmæla í kringum áramótin 2013 og 2014 (sem sumir einfeldningar trúa að hafi verið skipulögð af bandarísku leyniþjónustunni).

Úkraínumenn berjast fyrir frelsi og fullveldi, að verða raunverulega frjáls til að lifa – og í dag er það Úkraína sem vill ávinna sér réttinn til þess að kallast land hinna frjálsu og heimkynni hugdjarfra.

Þess vegna er barátta Úkraínumanna barátta allra sem standa fyrir frelsi. Án frelsis er friðurinn orðin tóm.“

Þó undarlegt megi virðast eru ófáir fræðingar og rýnendur alþjóðamála á öndverðum meiði við Þórdísi Kolbrúnu. Þeir eru margir góðir með sig og sannast nú einu sinni sem oftar, að sælir eru einfaldir. Sumir úr sauðahúsi Þórdísar Kolbrúnar kalla þá líka „nytsama sakleysingja.“

Þau tíðindi hafa meira að segja orðið, að bandaríska leyniþjónustan í landi hinna hugprúðu og frjálsu, CIA, hefur liðkað fyrir grein í „Nýja Jórvíkurtímanum„ (NYT), þar sem ljóstrað er upp um þátt Bandaríkjanna í stríðinu.

Greinin ber titilinn: „Félagið: Leyndarsagan um stríðið í Úkraínu“ (The Partnership: The Secret History of the War in Ukraine). Í hnotskurn er niðurstaðan sú, að hér hafi Bandaríkin/Vesturveldin háð stríð gegn Rússum og beitt fyrir sig Úkraínumönnum. Bandaríkjamenn og Bretar höfðu veg og vanda af undirbúningi og hernaðaráætlanir voru yfirleitt gerðar í bandarískri herstöð í Wiesbaden í Þýskalandi.

Engu að síður hlýtur hinum einföldu að vera ljóst, að Bandaríkja- og Úkraínumenn séu – eins og Þórdís Kolbrún bendir svo eftirminnilega á – að verja frelsi og lýðræði Íslendinga, Bandaríkjamanna og annarra frjálsra samfélaga í Vestrinu. En stríðið er tapað eins og öll önnur stríð Bandaríkjamanna – og þau hafa verið mörg - eftir að síðustu heimstyrjöldinni lauk.

Því er sorglegt til þess að vita, að einfeldningarnir á NYT skuli grifla slíka dellu. Því leyfi ég mér í allri auðmýkt að leggja til, næst þegar Þórdís Kolbrún drepur niður penna, að NYT verði lesinn pistillinn. Það er hefð fyrir því, að íslenskir stjórnmálamenn viðri skoðanir sínar í bandarískum fjölmiðlum, sbr. grein Katrínar Jakobsdóttur um bakslag kvenfrelsisbaráttunnar. Hún rassskellti Bandaríkjamenn hressilega. Enda horfa þeir löngunaraugum til íslensku vekni- eða vókparadísarinnar.

Það gæti verið snilldarbragð hjá Þórdísi Kolbrúnu að hrósa Donald John Trump í leiðinni fyrir tilburði til að semja frið við Rússa, enda þótt þeir tilburðir gagni í berhögg við öll skilyrði Rússa og Bandaríkjamenn tefli fram viðvaningum.

Þórdís Kolbrún vandaði forsetanum nefnilega ekki kveðjurnar á sínum tíma: „Trump er þröngsýnn, fáfróður, fordómafullur fábjáni. Hans málflutningur er markmið hryðjuverkamanna. Að hans fylgjendur telji okkur hin naív er hjákátlegt.“

En, en! Rússar og Bandaríkjamenn tala enn saman og Vindhaninn í Washington lét hjá líða að setja enn frekari tolla á Rússa, þegar upp rann nýr „Frelsisdagur“ (Liberation Day) annan apríl. Og svo hafa meira að segja bandarísk fyrirtæki sótt um að taka þátt í ráðstefnu í Sankti Pétursborg í næsta mánuði.

Þar mun sjálfur Vondi-Valdi líklega birtast. Svo, það er von, þó enn hvíli ógnin um „viðskiptaþvinganir úr helvíti“ yfir Rússum. Þessu hótar Evrópusambandið. Það gæti verið sama helvítið og Nató bauð Serbum 1999. En þeir afþökkuðu eins og Rússar nú.

Það mætti hugga Dónald Jón og Vonda-Valda með orðum Williams Shakespeare (1564-1616): „Sæt eru mótlætisins not, sem eins og padda – ljót og eitruð – ber þó dýrmætan gimstein í höfði sér.“ (Helgi Hálfdánarson)

Þrátt fyrir samræður Rússa og Bandaríkjamanna virðist stórsókn Rússa í undirbúningi, enda eru þeir í óða önn að sprengja hergögn sem Dónaldur Jón og „óvinir“ hans í Evrópu – þar á meðal núverandi utanríkisráðfrú Íslendinga, hin efnilega Þorgerður Katrín Gunnarsdóttir - senda hinum hugprúðu og frjálsu í Úkraínu.

Það er skelfilegt til þess að hugsa, að stríðshryllingurinn skuli halda áfram. Rússar taka um þessar mundir fermingarstráka og kvennaherdeildar til fanga. Það er engu líkara en að við séum að nálgast Berlin 1945.

En það verður að herða upp hugann. Vonandi kemur að því, að Úkraínumenn syngi með Ingimari Oddssyni - og verði jafn frjálsir af Rússum og Íslendingar: https://www.youtube.com/watch?v=L3nYI4SQwCo

„Ég er frjáls eins og fuglinn, flogið næstum ég gæti.

Mér er ekkert til ama flest nú eykur mér kæti.

Alsæll er ég því orðinn, ekki kann ég mér læti.

Ég er frjáls, ég er frjáls.

Það á vissulega líka við um ástmögur Íslendinga í Úkraínu, Volodymyr Zelensky. Hann fangelsaði alúðarvin sinn, Oleksandr Dubinsky, sem ber Volodymyr slæma sögu. Enda er hann einfeldingur. En Oleksander má reyndar hrósa happi. Venjulega lætur „vinur“ hans og frelsisins drepa andmælendur.

Utanríkismálasérfræðingur okkar, Þórdís Kolbrún, á fjölda aðdáenda. Einn þeirra er Þorsteinn Pálsson, sem segir um Þórdísi Kolbrúnu og öryggismál:

„Forysta utanríkisráðherra um aukna varnarsamvinnu og uppbyggingu aðstöðu á Keflavíkurflugvelli var mikilvæg. Umræðan hefði þó mátt vera meiri, ekki síst um þau gildi, sem að baki búa. [Því hefur Þórdís Kolbrún væntanlega bætt úr núna.)

Brýnt er að þessum samstarfsverkefnum verði markvisst fylgt eftir á nýju kjörtímabili. Reyndar þarf að útvíkka þau meðal annars vegna vaxandi ógna gegn innviðum og netöryggi. …

Margir hafa tilhneigingu til þess að líta á alþjóðlega samvinnu í efnahagsmálum annars vegar og varnar- og öryggismálum hins vegar sem tvo aðskilda hluti. Raunveruleikinn er allt annar.

Þegar Bandaríkin höfðu frumkvæði að varnarsamvinnu Evrópu og Ameríku á sínum tíma beittu þau sér samhliða fyrir innbyrðis efnahagssamstarfi Evrópuríkja. Æ síðan hafa þetta verið tvær hliðar á sama peningi.“

Þórdís Kolbrún berst vissulega fyrir frelsi okkar og öryggi. Hún á öflugan stuðning vísan, bæði í Litla-Sjálfstæðisflokknum (Viðreisn) og Stóra-Sjálfstæðisflokknum (Sjálfstæðisflokknum). Öryggið skal á oddinn og hverjir eru öruggari og hollari en Bandaríkjamenn?

Fleiri forystuhugsuðir í utanríkismálum hafa tekið til máls um nauðsyn slíkrar hollustu, íslensks hers, fleiri flugherstöðva og flotaherstöð. Einn þeirra er Jón Magnússon. Hann segir í sambandi við fundhöld íslenskra og bandarískra stjórnvalda:

„Að sjálfsögðu mundum við … krefjast þess að Bandaríkin afnemi alla tolla á íslenskar vörur og hefji viðræður um aukna hervernd, m.a. með því að byggja flotastöð í Finnafirði og myndarlegan flugvöll á Melrakkasléttu til að gæta sameiginlegra varnarhagsmuna.“

Hernaðarhyggjan blómstrar á Íslandi eins og víðar.

https://therealistreview.substack.com/p/americas-new-lost-cause https://rumble.com/v6rl46z-crosstalk-losing-peace.html?e9s=src_v1_upp https://voicefromrussia.ch/en/the-war-of-two-worlds-has-begun-part-1/#:~:text=No%20sustainable%20financing%20possible https://voicefromrussia.ch/auch-die-usa-schreiben-die-geschichte-um/ https://sonar21.com/trump-putin-a-deal-yalta-or-no-deal/?jetpack_skip_subscription_popup https://www.indianpunchline.com/russia-and-the-us-made-three-steps-forward-after-two-days-of-consultations-in-washington/ https://www.kitklarenberg.com/p/collapsing-empire-the-delusion-of?utm_source=post-email-title&publication_id=552010&post_id=160879734&utm_campaign=email-post-title&isFreemail=true&r=ry8jq&triedRedirect=true&utm_medium=email https://glenndiesen.substack.com/p/the-war-is-effectively-over-and-russia?utm_source=post-email-title&publication_id=2670149&post_id=160926539&utm_campaign=email-post-title&isFreemail=true&r=ry8jq&triedRedirect=true&utm_medium=email https://www.globalresearch.ca/evolution-nato-aggression-serbia-russia/5883790 https://glenndiesen.substack.com/p/former-zelensky-ally-speaks-out-from?utm_source=post-email-title&publication_id=2670149&post_id=160121716&utm_campaign=email-post-title&isFreemail=true&r=ry8jq&triedRedirect=true&utm_medium=email https://www.visir.is/g/20252693792d?fbclid=IwY2xjawIsan9leHRuA2FlbQIxMQABHWcBExPQn1Uuk6GdyaoZSVXrk12R4bCpOvwCCMWYnN06L4eUIKZOJIVutA_aem_PTRo6saVKscr9CXh04Rd1w https://jonmagnusson.blog.is/blog/jonmagnusson/entry/2312697/?fb=1&fbclid=IwY2xjawJjI5FleHRuA2FlbQIxMQABHru-npoROlD79viPtgomyHAcfqqsOGN6ao4piR0gzP1LbIEVca28zcN6kidq_aem_5Gjx3leKdwhcs86TcAFFCQ https://www.mbl.is/frettir/innlent/2025/03/18/ottast_erlenda_ihlutun_a_islandi/?fbclid=IwY2xjawJGdAdleHRuA2FlbQIxMQABHUVjXLFhaCIEnAqFTteUdOKvWxDanLAJLDrAoaTSZVwoFxVc_iGTIl4XtQ_aem_K8Qk2Kss3XnRq0J-iaPayg https://www.indianpunchline.com/trump-putin-parley-is-a-bit-under-the-weather/ https://gilbertdoctorow.com/2025/04/02/why-is-donald-trump-in-such-a-rush-to-conclude-a-cease-fire-in-ukraine/ https://www.kitklarenberg.com/p/echr-finds-ukraine-responsible-for?utm_source=post-email-title&publication_id=552010&post_id=160179175&utm_campaign=email-post-title&isFreemail=true&r=ry8jq&triedRedirect=true&utm_medium=email https://www.youtube.com/watch?v=85_qJLCd_c8 https://therealistreview.substack.com/p/the-unnecessary-war?utm_source=substack&utm_medium=email https://mearsheimer.substack.com/p/sergey-karaganov-vs-jjm?utm_source=post-email-title&publication_id=1753552&post_id=160379412&utm_campaign=email-post-title&isFreemail=true&r=ry8jq&triedRedirect=true&utm_medium=email https://marksleboda.substack.com/p/russia-advances-across-frontline?utm_source=post-email-title&publication_id=1083041&post_id=160887021&utm_campaign=email-post-title&isFreemail=true&r=ry8jq&triedRedirect=true&utm_medium=email https://www.kitklarenberg.com/p/its-official-ukraine-conflict-is?utm_source=post-email-title&publication_id=552010&post_id=160406409&utm_campaign=email-post-title&isFreemail=true&r=ry8jq&triedRedirect=true&utm_medium=email https://www.youtube.com/watch?v=NRQAZubiGu4 https://www.nytimes.com/interactive/2025/03/29/world/europe/us-ukraine-military-war-wiesbaden.html?unlocked_article_code=1.8E4.eCjt.YhxP1GmiLJY-&smid=url-share