Alþjóðadagur kvenna. Katrín er komin heim og kvenfrelsunarsóttin elnar enn

Það er Alþjóðlegur hátíðardagur kvenna í dag (8. mars) og Katrín er komin heim. Hún sótti enn eina trúarhátíðina um frelsun kvenna og barna þeirra hjá æðstapresti Sameinuðu þjóðanna, António Guterres.

Katrín okkar var lúin og mædd. António trúði henni fyrir því, að enn tæki þrjár aldir að frelsa konur (og börnin þeirra væntanlega). Markviss kvenfrelsun hefur nú staðið yfir í rúma eina og hálfa öld, enda þótt hún hafi ekki komist á skrið, fyrr en auðdrottnar veraldar sáu sér leik á borði og fóru að bera fé á kvenfrelsarana til að skapa upphlaup og ringulreið, en umfram allt að koma ódýru vinnuafli á markað. Það tókst svo sannarlega.

Katrín er líka mædd vegna svokallaðs bakslags í réttindabaráttu hinsegin fólks, kvenna og annarra kúgaðra (minnihluta)hópa. Henni er efst í huga takmarkanir á geðþóttaákvörðunum kvenna til fóstureyðinga. Katrín linnir líklega ekki látum, fyrr en Alþingi samþykkir fóstureyðingar, fram að fæðingu. Það virðist vera meðal helstu prófsteina á endanlega frelsun kvenna.

Nýtt kúgunarböl hefur bæst við, að sögn Katrínar; karllæg gervigreind. Tja! Það er margt kvennabölið. Og engin er búkona, nema hún barmi sér.

Kona er nefnd Janice Fiamengo, fyrrverandi enskuprófessor frá Kanada. Hún er fyrrum kvenfrelsari, en fann lækningu; þekkingu, alvöru vísindi, opinn hug og skýra hugsun. En því miður elnar Katrínu stöðugt kvenfrelsunarsóttin.

Það er fróðlegt að skoða muninn á málflutningi þeirra. Nýlega birti Janice tvær athyglisverðar greinar í þessu sambandi. Hún segir m.a.:

Á Alþjóðadegi kvenna ber að dáðst að konum, en jafnframt grandskoða, hvernig megi hampa þeim frekar, að mestu leyti á kostnað karlkyns skattgreiðenda. Á heimasíðu hátíðahaldanna er bent á, að setja þurfi sanngirni í brennidepil og gera sér grein fyrir, að það dugi skammt að bjóða jöfn tækifæri, því jafnrétti feli ekki ævinlega í sér réttlæti.

Því þurfi að gera meira af því að hygla konum í löggjöf og á framabraut, ásamt því að ástunda enn frekari jákvæða mismunum í þeirra þágu. Greinarhöfundar heimasíðunnar eru þó heldur bjartsýnni en António og Katrín. Jafnrétti kvenna mun nást, að öld liðinni, segja þeir. Hátíðin stuðlar enn að sjálfsdýrkun kvenna og sjálfsvorkunn.

Janice rifjar upp gömul kvenfrelsunarhugtök úr frelsuninni endalausu. Einu sinni aðhylltust konur kenningar Simone de Beauvoir (1908-1986) um síðra kynið. Þær voru „hinn“ (l‘autre) á tyrfnu tungumáli tilvistarspekinga.

Clara Zetkin (1857-1933), sem fyrst átti hugmyndina að alþjóðlegum frelsunardegi kvenna, taldi það – eins og Sólveig Anna Jónsdóttir – borgaralega firru, að konur krunkuðu sig saman, þ.e. karlmannslausar, til að frelsa bara konur.

Sólveig elur þó á umtalsverðum kala í garð hins óþokkasæla „feðraveldis,“ sem er kjörinn blóraböggull eymdar kvenna fyrr og síðar. Það getur verið kvalafullt að taka ábyrgð á sjálfri sér. Janice segir:

„Um þessar mundir er það svo, að í yfirlýsingum [forsprakka] Alþjóðakvennadagsins er áberandi skortur á umfjöllun um samvinnu {kynjanna og] sameiginlega viðleitni [karla og kvenna]. Ei heldur er viðurkennd mennska karla, afrek og þarfir (burtséð frá þörf þeirra til að læknast af „eitraðri karlmennsku“ eða lúta frekar í duftið fyrir konum). Þar er þrástagast á því, að „kynjajafnrétti“ (eða kynjaréttlæti) felist í því að hossa einvörðungu konum og hampa.“ Þarna er menningu vorri lýst í hnotskurn.

Það má einu gilda, hvort rætt er um sjálfsvíg, fíkniefnaneyslu, störf, fangelsun, heimilisleysi eða morð. Enda þótt karlmenn komi hér miklu oftar við sögu, er samfélagið frá sér numið af raunum kvenna.

Umrædda píslarvættishátíð ætti að leggja af. Hún endurspeglar hverja aðra fordóma, tákn um um það tímabil í sögu mannkyns, þegar mennsku kvenna var hampað á kostnað karla. Skólabörnum á að kenna, að samfélög, sem enn halda slíka hátíð, séu karlmönnum og börnum vond.

Það verður að andæfa og gera grín að kvenfrelsurum, sem halda því fram, að „konur séu framtíðin.“ Kvenyfirburðahyggja, kvenhatur og kvenfólska er ekki boðleg.

Í stað Alþjóðakvennadagsins ætti að koma Alþjóðadagur karla og kvenna, þar sem áhersla væri lögð á samlyndi í stað sundurlyndis, kynjaaðskilnaðarstefnu.

En konur gætu hafa fengið nóg af kven- og kynjafrelsurum sínum, fólki eins og Katrínu.

Einu sinni söng Aretha Franklin „Þú laðar fram í mér þá tilfinningu að vera eðlileg kona“ (You make me feel like a natural woman). Áróðurshópur kynskiptinga og kvenfrelsara hefur krafist þess, að lagið verði bannað í menningunni, því þar sé talað um „náttúrlega“ konu.

Þetta minnir óneitanlega á uppþot harmkvælasinnanna (woke) í sambandi við lagið, „Krúttið mitt, það er hrollkalt úti við“ (Baby, it is cold outside). Þar fagnar kona því, að karlmaður hafi stígið í vænginn við sig, flekað, og sýnt dæmigert kynofbeldi eins og Katrín, Kvennaathvörfin, Vinnueftirlitið og Velvirk, eru með á heilanum, að ógleymdum Stígamótum og RÚV.

Síðarnefnda lagið kölluðu kvenfrelsarar hvatningu til nauðgunar kvenna, en eins og landsmenn vita, ríkir nauðgunarmenning, þ.e. piltar, sem nauðga stúlkum, í framhaldsskólum landsins. Svo segir Skólameistarafélagi Íslands. Það kveður þó líklega rammar að þessu hátterni í Úkraínustríðinu. En þar vopnar Vladimir Putin herkarla sína með stinningarlyfjum til að auðvelda þeim nauðganir á konum, að sögn RÚV og SÞ. (Þeir fá að vísu líka skóflur, samkvæmt sömu heimildum.)

(Því má til fróðleiks skjóta inn, að Ólöf Ragnardóttir á RÚV fræddi landsmenn á því í gær, að 90% afganskra kvenna yrði að láta sér lynda ofbeldi karla sinna. Kvenfundarmenn á landsfundi Samfylkingarinnar um árið höfðu hins vegar allar sem ein, 100%, orðið fyrir kynofbeldi. Svo afgangskar konur sleppa tiltölulega vel.)

Stundum líður fólki vel í sturlun sinni. En ég óttast, satt best að segjast, að kven- og kynjafrelsurum líði illa í sínum hugarheimi. Þeim verður seint fullnægt. Við verðum í nafni karlúðar og karlmennsku að rétta þeim hjálparhönd. Eins og allir vita, steðja karlar konum sínum til hjálpar, sérstaklega, ef þær eru í nauðum staddar.

https://fiamengofile.substack.com/p/thousands-of-women-defend-aretha?utm_source=substack&utm_medium=email https://www.npr.org/2018/12/05/673770902/baby-it-s-cold-outside-seen-as-sexist-frozen-out-by-radio-stations https://feature.undp.org/future-is-female/ http://empathygap.uk/ https://www.washingtonpost.com/opinions/why-cant-we-hate-men/2018/06/08/f1a3a8e0-6451-11e8-a69c-b944de66d9e7_story.html https://www.youtube.com/watch?v=gfrx1t1O49E&t=98s https://www.thegatewaypundit.com/2023/01/aretha-franklins-natural-woman-deemed-offensive-trans-community/ https://www.dailymail.co.uk/news/article-11666981/Now-Aretha-Franklins-song-Natural-Woman-deemed-OFFENSIVE-trans-women.html https://www.internationalwomensday.com/about https://fiamengofile.substack.com/p/why-i-do-not-celebrate-international?utm_source=substack&utm_medium=email https://www.npr.org/2018/12/05/673770902/baby-it-s-cold-outside-seen-as-sexist-frozen-out-by-radio-stations https://www.youtube.com/watch?v=8jCFzreP1ng

Verða Íslendingar útlagar í nýjum heimi? Sér grefur gröf

Það virðist renna upp fyrir Bandaríkjamönnum, að „alþjóðareglur“ þeirra um samskipti við önnur ríki verði stöðugt óvinsælli. Enda eru þær samdar af þeim sjálfum til að vernda eigin hagsmuni.

Uppgangur Kína, Rússa og Indverja, gefur þjóðum „þriðja heimsins“ eða ríkjum sunnan miðbaugs, fyrirheit um annars konar alþjóðareglur. Þau dreymir meira að segja um heim, þar sem þau verða fær um að hrista af sér ok aldalangs arðrás alþjóðlegra auðhringa og nýlenduvelda.

Einu sinni voru Íslendingar nýlenduþjóð og eru það í vissum skilningi enn þá, andlega og stjórnmálalega. Við höfum gagnrýnilaust gert fyrrum kúgara að vinum og skipum okkur í sveit með þeim í alþjóðamálum. Þangað leitar klárinn sem hann er kvaldastur.

Ofangreindir vinir hafa á síðustu árum beitt Íslendinga viðskiptaþvingunum og Barrack Obama, Bandaríkjaforseti, gaf á sínum tíma út tilskipun þess efnis, að halda skyldi samskiptum við Íslendinga í lágmarki, nema hvalveiðibanni hans yrði hlýtt.

Gordon Brown, forsætisráðherra Breta, gerði okkur að hryðjuverkamönnum. Vinirnir, að Norðurlandaþjóðunum undanskildum, höfnuðu fjárhagslegri fyrirgreiðslu, þegar bandaríska kreppan reið yfir þjóðina. Þá sýndu Rússar vinsemd. Þorskastríðunum hafa líklega flestir gleymt.

Það leikur varla á tveim tungum, að í utanríkismálum séu Íslendingar taglhnýtingar Bandaríkjamanna og annarra vina í Nató. Þeir hafa óbeint tekið þátt í fjölmörgum brotum á alþjóðalögum og lagt blessun sína yfir hryðjuverk og hernað gegn vinaþjóðum, síðast, þegar gasleiðsla granna okkar á meginlandinu var sprengd í loft upp. (Yfirklór Bandaríkjamanna þess efnis, að tveim úkraínskum köfurum sé um að kenna, er blátt áfram grátbrosleg.)

Fyrrverandi forseti Bandaríkjanna, hinn háaldraði Jimmy Carter, hefur lýst því yfir, að lýðræði sé ekki lengur við lýði í ríki hinna hugprúðu og frjálsu, að „Bandaríkin séu án vafa herskáasta ríki veraldar fyrri og síðar.“ (Samkvæmt þessu er því rangt að halda því fram, að Bandaríkjamenn flytji út lýðræði - nema þá í líkpokum.)

Í nýlegri bandarískri samantekt er upplýst (The Military Intervention Project – Tuft University), að fjörutíu ríki, víðs vegar um heim, hafi verið beitt viðskiptaþvingunum. Fjögur hundruð sinnum hefur bandaríski herinn farið með ófriði á hendur öðrum ríkjum undir gunnfána lýðræðis og frelsis.

Sama á við um svokölluð stríð gegn hryðjuverkamönnum, sem gengið hafa af tæpri milljón manns dauðri, skapað glundroða, eymd og fátækt. Þessum stríðum eigum í megingreinum það að þakka, að flóttamönnum fjölgar stöðugt í veröldinni.

Þegar vinir okkar höfðu blekkt veröldina með áróðri um gereyðingarvopn í Írak, létu þeir til skarar skríða og skópu íbúum Íraks helvíti á jörðu. Íslendingar stóðu þá með vinum sínum og greiddu flutningi hertóla leið til þessa fjarlæga fornmenningarlands, þar sem vagga menningarinnar stóð. „Annað hvort eru þið með okkur eða móti,“ sagði hinn heillum horfni forseti Bandaríkjamanna, George W. Bush.

Þessi boðskapur laust eyru fulltrúa um 90% jarðarbúa á þingi nýlega. Þeir skirrast við að styðja þá stefnu Bandaríkjanna/Vesturlanda að steypa lýðræðislegri stjórn Úkraínu og koma á fót úkraínskum Natóher, með þeim fyrirséðu afleiðingum, að Rússar gerðu innrás. Nefndir fulltrúar neita líka að taka þátt í kunnuglegri yfirlýsingahræsni og bolabrögðum Vesturlanda í viðskiptum.

Því efnahagslegar og hernaðarlegar hamfarir auðdrottna Vesturlanda og auðsveipra stjórnmálamanna þeirra á alþjóðavettvangi, er illur fyrirboði. Stríð og kreppugerð eru þaulreyndar aðferðir hertólaframleiðenda til að auðgast. Þannig sækja þeir aura skattgreiðenda í ríkissjóði og vefja ríki og þegna þeirra í skuldir.

Auðdrottnarnir hafa þegar hagnast vel á bóluefnum og lyfjum. Þegar ríki fara á hausinn bíður Alþjóðabanki auðhringanna með opinn arminn. En nú gæti komið babb í bátinn. Það eru nefnilega líkur til, að fleiri og fleiri ríki fúlsi við seðlum þeirra. Þá er viðbúið að spilaborgin falli. Bandaríkin er í raun gjaldþrota.

Þegar heimurinn tekur á sig nýja mynd og fnæst verður að yfirgangi og yfirlæti Vesturlandabúa, er hætt við, að Evrópu og Bandaríkjunum fatist flugið. Vængjaslátturinn er þegar orðinn næsta veiklulegur hjá sumum aðildarríkja Nató. Mótmælendum vex fiskur um hrygg, þó varla sé á það minnst í fréttaskeytum.

Tyrkir kurra og murra og urra, margfaldir í roðinu. Uppsögn gæti verið á næsta leyti. Ungverjar eru óþægir. En þegar allt um þrýtur er næsta ólíklegt að alþjóðlegum böðlum og vinum þeirra verði boðið til borðs.

Ætli Íslendingar verði útlagar í nýrri veröld? Ætli þeir verði látnir sæta viðskiptaþvingunum af þeim, sem þeir hafa skorið upp herör gegn? Það gerðist um árið, þegar þeir fóru í viðskiptastríð við Rússa undir forystu "hárkerastofukvenfrelsarans" frá Sauðárkróki, Gunnars Braga Sveinssonar.

Íslensk stjórnvöld leggja lóð sitt á vogarskál ósættis og ófriðar í viðbjóðslegu og ónauðsynlega stríði (nema fyrir hergagnaiðnaðinn að sjálfsögðu) í Úkraínu.

Þar falla unglingspiltar í hrönnum. Samtímis verður stríðsáróðurinn sífellt grátbroslegri. Rússneskum hermönnum er att á foraðið með skóflur og stinningarlyf að vopni, segja Sameinuðu þjóðirnar og RÚV. Þrátt fyrir þennan skringilega vopnabúnað hefur „hakkavélin“ í Bakhmut þjónað tilgangi sínum.

Ég skora á íslensk stjórnvöld að girða sig í friðarbókina. Hvar er andi Þorgeirs Ljósvetningagoða, mesta friðarhöfðingja Íslendinga?

https://sonar21.com/the-fall-of-bakhmut-a-prelude-to-the-fall-of-ukraine/ https://steigan.no/2023/03/lognen-og-hatet/?utm_source=substack&utm_medium=email https://covertactionmagazine.com/2023/02/20/left-and-right-join-together-to-rage-against-ukraine-war-on-its-one-year-anniversary/ https://covertactionmagazine.com/2023/03/06/with-us-or-against-us-fails-in-munich-and-bengaluru-as-u-s-tries-offer-they-cant-refuse/?mc_cid=95cc78f2f2&mc_eid=5cd1ec03b1 https://apnews.com/article/g-20-summit-bangalore-janet-yellen-china-india-54d46cf97ab66a6325ccc259e62e36b2 https://www.reuters.com/world/host-india-does-not-want-g20-discuss-more-sanctions-russia-sources-2023-02-22/ https://thecradle.co/article-view/21844/in-munich-west-sounds-alarm-over-global-south-stances https://www.newsweek.com/nearly-90-percent-world-isnt-following-us-ukraine-opinion-1743061