Um að pissa í skóinn sinn. Nýja draumlandið og efnahagsstríðið gegn Rússlandi

Hin herskáa Skagamær og utanríkisráðherra Íslendinga, Þórdís Kolbrún Reykfjörð Gylfadóttir, sagði sauðsvörtum almúga Íslands, að nú skyldu Rússar komast að því, hvar Davíð keypti ölið. Efnahagslegt stríð Íslendinga og annarra Evrópuþjóða yrði Rússum svo háskalegt, að þeir myndu snauta úr Úkraínu með skottið milli lappanna og biðjast vægðar – svo máttug væru Vesturlönd.

En viturt fólk og sáttfúst benti á aðrar leiðir til að koma vitinu fyrir Rússa og varaði við því, að efnahagsstríð, með áframhaldandi hernaðaraðstoð til Úkraínumanna, yrði sem olía á eld, og yki líkur á því, að stríðsaðgerðir Rússa færu úr böndunum. Það myndi leiða til frekari hörmunga fyrir Úkraínumenn og yki hættu á stórstyrjöld. Það var einnig á það bent, að efnahagsstríð myndi koma allri álfunni í enn hættulegra uppnám, þ.e. til viðbótar veiruvitfirringunni.

Það er algild reynsla, að viðskiptabönn komi helst niður á þeim, er síst skyldi. Sem dæmi má nefna Íran og Írak. Þar leiddi viðskiptabann Vesturlanda til ólýsanlegra hörmunga fyrir almenning. Tilgangur Vesturlanda – stundum yfirlýstur - er að stuðla að uppreisn gegn yfirvöldum í Rússlandi og knýja fram stjórnarbyltingu. Stuldur og/eða kyrrsetning á gjaldeyrisvaraforða ríkisstjórna – einkum í dölum eða pundum - á að þjóna sama tilgangi.

Öðru máli gildir um auðsöfnun og fjármálaumsvif auðvalda (oligarch) Rússlands. Vladimir Putin og fyrrverandi eiginkona eru þar meðtalin. Þau ber að rannsaka. Þar eru þjófar og þjófsnautar í hrönnum. Þeir ráðskast með fjármuni rússnesku þjóðanna. En hví þarf innrás í Úkraínu til? Og hví eru auðvaldar Úkraínu undanskildir?

Nú skal sem sé aftur reyna að fjarlægja Vladimir Putin og félaga hans, auðvaldanna, sem Rússlandi ráða, með efnahagsstríði. Með hliðsjón af reynslunni af fyrri viðskiptaþvingunum gegn Rússneska ríkjasambandinu, Íran og Írak, eru varla miklar líkur á því, að það takist. Vesturlönd eru fákæn. Aðgerðirnar endurspegla fjörbrot heimsvelda, „Sameinaðra nýlenduvelda Evrópu“ og Bandaríkja Norður-Ameríku.

Efnahagsstríðið hraðar einungis þeirri breytingu, sem á sér stað í veröldinni. Hernaðarleg og efnahagsleg yfirráð Bandaríkjanna, heimsvaldastefna þeirra, er á hverfanda hveli, rétt eins og þess breska. Gildi gjaldmiðils þeirra, dalsins, fer þverrandi, sérstaklega eftir að trúustu bandamenn þeirra í Miðausturlöndum, Sádí-Arabar, skiptu um hest í miðju vaði og vilja eiga viðskipti í kínverska gjaldmiðlinum, jeni. Hrynji gildi olíudalsins (petro dollar) missa Bandaríkjamenn allt niður um sig.

Hásri heimsveldisröddu hótar Joseph Biden Kínverjum og Indverjum meira að segja efnahagsstríði, styðji þeir ekki efnahagslegt árásarstríð þeirra og Vesturveldanna gegn Rússum. Samtímis stíga þeir í vænginn við erkifjandann, Írani, sem þeir hafa gert marga skráveifuna. Þeir ágirnast olíuauð Írana eins og Vesturveldin hafa lengi gert, sérstaklega Bretar og Bandaríkjamenn. En þar hittir skrattinn fyrir ömmu sína.

Því miður eru vísbendingar um, að Vesturveldin gætu verið að fremja efnahagslegt sjálfsvíg. T.d. snarhækkar eldsneyti í verði. Stétt flutningabílstjóra í Evrópu mótmælir um þessar mundir háu eldsneytisverði rétt eins og kanadískir starfsbræður (og líklega nokkrar -systur) mótmæltu smitvarnagerrræði stjórnvalda. Á Spáni andæfa þeir harðvítugt.

Um leið og flutningar stöðvast, fækkar vörum í hillum verslana. Aukinn framleiðslukostnaður þýðir hækkandi vöruverð, aukna verðbólgu, gjaldþrot og svo framvegis, meira að segja á Íslandi í vígi herskáu Skagamærinnar.

Ætli utanríkisráðherra vor hafi sett sig inn í kenningar og áætlanir formannsins, Klaus Schwab, og félaga í Alheimsefnahagsráðinu (World Economic Forum) um allsherjar ringulreið og upplausn í veröldinni, svo endurræsa megi hina nýju, fögru veröld, á grundvelli sjálfbærni- og þróunarmarkmiða Sameinuðu þjóðanna (sustainable development goals), þ.e. að binda enda á óhóflega fátækt, minnka ójöfnuð og vernda jörðina (planet). (Þórdís Kolbrún og Katrín gætu leiðst inn á næstu samkomu.)

Grundvallarhugmyndin er græn, þ.e. að vernda jörðina fyrir ofhitun og ofræktun og átroðningi mannkyns. Því ber að fækka fólki. Alheimsríkisstjórnin sér til þess, að eftirlifendum séu jafnt skömmtuð lífsins gæði, samkvæmt skilgreiningum hennar og stöðugu eftirliti. Heilsa eftirlifenda verður tryggð með bólusetningum og hegðun með skynsemisforriti.

Þetta er reyndar sama grundvallarfyrirkomulag og í gamla draumalandinu, þar sem sólin í austrinu rís, innleitt með vopnavaldi og öðru ofbeldi, öreigafrelsið, alræði öreiganna, stjórnað af úrvalshópi gáfumanna.

Svo það er óneitanlega til nokkurs að hlakka í veirufári og stríðssorg.

https://www.nakedcapitalism.com/2022/03/spanish-industry-begins-grinding-to-halt-after-four-day-nationwide-truckers-strike.html

https://steigan.no/2022/03/deler-av-den-spanske-okonomien-stopper-opp-etter-fem-dagers-landsomfattende-lastebilstreik/

https://dailyexpose.uk/2022/03/21/dr-vernon-coleman-us-manipulated-russia-ukraine-war/

https://steigan.no/2022/03/sanksjoner-er-et-krigsvapen-og-det-rammer-forst-og-fremst-de-fattigste-og-mest-utsatte/

https://www.thelocal.es/20220318/spanish-truck-drivers-strike-continues-as-food-shortages-hit-consumers/

https://steigan.no/2022/03/russlands-okonomi-ikke-sa-sarbar-som-vesten-onsker-seg-okonomer-tror-ikke-pa-statskonkurs/

https://apnews.com/article/business-europe-spain-d1da052d52c64f2e5e2ee18ccdfdc7bd

https://www.reuters.com/business/energy/truckers-strike-spain-disrupts-food-industry-2022-03-17/

https://jalopnik.com/the-truckers-strike-phenomenon-moves-to-spain-1848672725

Draumalýðræðið

Gildi frásagnarinnar eða sögunnar verður seint ofmetið í mannlífinu. Við segjum söguna af okkur sjálfum, fjölskyldunni, hópunum og þjóðinni sjálfri – eða ríkinu og veröldinni. Sjálfsagan verður eins konar skilningsrit, sem stjórnar skynjun, hugsun, tilfinningum og viðhorfum. Sjálfsagan liggur – ásamt eðlinu og hópaðildinni – til grundvallar manngerðinni sjálfri.

Arfur kynslóðanna er mikilvægur með tilliti til frásagnarlistarinnar; þróun tegundar, mannlífsins og menningar. Maðurinn er félagsvera; hópvera, hjarð- eða múgvera. Aðild að hópi er lífsnauðsyn. Því er hópsagan örlagarík, gildi og lögmál (inn)hópsins, hjarðarinnar. Henni fylgir taumhald og viðurlög. Útskúfun, útlegð, skógargangur, er grimmileg refsing. Jaðrar við líflát.

Sjálfsöryggi, innra og ytra öryggi, öryggi hópsins, þjóðarinnar, er önnur lífsnauðsyn. Því hefur ævinlega legið lífið við að greina sem skjótast andskota, óvini, hina, (út)hópinn. Sú þörf virðist rík í mannfélaginu, snar þáttur í sjálfsskilningi hvers og eins, rauður þráður sjálfsgreiningar- og viðmiðunarsögu.

Hinir valda tortryggni, andúð og vekja sjálfsvörn. Meira að segja framandi hugsun og siðir hinna. Reyndar allt sem ógnar sjálfssögunni, hópsögunni. Fólk bregst ókvæða við, ber sér á brjóst með skírskotun til sjálfssögunnar, ver sögu sína, líf og ásjónu. Aðildarviðurkenning hópsins er forsenda sjálfsöryggisins. Án hennar erum við skipreika í lífsins ólgusjó.

En sagan er háð valdi. Hver segir söguna? Hver er sögumaður? Foreldrar, skóli, hópur, stjórnvöld? Hvað er sjálfsvaldið? Valdið til að segja söguna af okkur sjálfum og taka ákvarðanir í eigin lífi og taka þátt í stjórnum samfélagsins, vera jafnoki hinna, jafnrétthár hinum, gildur hluti lýðsins, jafn fyrir lögum og reglum. Sjálfsákvörðunarrétt, frelsi og lýðræði ber oft á góma í því sambandi.

Lýðræði er stjórnunarfyrirkomulag eða -sáttmáli, sem byggir á virðingu fyrir óþvinguðu sjálfsvaldi, þar sem fólk ræður því sjálft, að hve miklu leyti það framselur vald sitt til fulltrúa, sem taka ákvarðanir um stjórn samfélagsins í umboði hlutaðeigandi.

Drauma- eða kjörlýðræði er samfélag fólks, sem býr við óskorðað félagafrelsi, málfrelsi og frelsi til athafna og atvinnu. Í slíku samfélagi eru greinileg skil millum sviða ríkisvaldsins; löggjafarvalds, framkvæmdarvalds og dómsvalds. Þessi þrískipting er bundin í stjórnarskrá.

Stundum er talað um fjórða valdið, fjölmiðlunarvaldið, eins konar tjáningarfrelsisvald, viðaukavald við málfrelsið.

Slíkt draumasamfélag er kallað opið og frjálst. Býrð þú í draumalýðræði?